అలివేణి ఆణిముత్యమా

చిత్రం: ముద్ద మందారం
సంగీతం: రమేశ్ నాయుడు
సాహిత్యం: వేటూరి సుందరరామమూర్తి
నేపథ్య గానం: బాలు & జానకి

అలివేణి ఆణిముత్యమా
నీ కంట నీటి ముత్యమా?
ఆవిరి చిగురు ఇది ఊపిరి కబురు
స్వాతి వాన లేత యెండలో
జాలి నవ్వు జాజి దండలు
అలివేణి ఆణిముత్యమా
నా పరువాల ప్రాణ ముత్యమా
జాబిలి చలువు ఇది వెన్నెల కొలువు
స్వాతి వాన లేత యెండలో
జాజిమల్లి పూల దండలో

కుదురైన బొమ్మకి కులుకు మల్లె రెమ్మకి
నుదుట ముద్దు పెట్టనా వొట్టుగా
వొద్దంటే వొట్టుగా...
అందాల అమ్మకి కుందనాల కొమ్మకి
అడుగు మడుగు లొత్తనా మెత్తగా
ఔనంటే తప్పుగా...

పొగడలేని ప్రేమకి పొన్న చెట్టు నీడకి
పొగడదండలల్లుకోనా పూజగా
పులకింతల పూజగా...
తొలి జన్మల నోముకి దొర నవ్వుల సామికి
చెలిమై నేనుండిపోనా చల్లగా
మరుమల్లెలు చల్లగా...